作者：春麗
｜欄目：#見上帝前走多轉｜
人生中，有過五次突然離開comfort zone的經驗：
第一次，是30分鐘巴士的距離。
11歲那年。由踩單車返學的鄉村學校，當時小六升中一，去到突然變成日日坐巴士往返城市（其實只係元朗市中心）讀中一的開始。仍然記得很清楚，9月1日第一日返學校的情景，那種恐懼感，連坐巴士都因為唔夠高㩒鐘落車而飛站，嚇到我死！
第二次，由老家石湖圍獨自搬到西環均益一期的距離。
那年19歲，入了行做記者，日日由元朗返鰂魚涌華蘭路實在難頂，所以膽粗粗離開父母自己生活。那一天，爸爸媽媽望著我揮手的畫面，仍像昨日，「記得返嚟飮湯！」，係阿媽重複講咗十次以上的說話；
第三次，29歲，離開自己的comfort zone決定跟從耶穌的距離。
可以這樣説，這是我一生的轉捩點，就係呢個決定。之前兩次，帶著好多恐懼同埋未知。可以話，離開只係為咗生活，迫不得已。但這次跟隨耶穌，係自己揀嘅，係要決定離開自己的comfort zone，就好似要放棄自己「老我」一樣，相信自己可以有一個更美的自己，一個可以「活着不再是我」，在耶穌基督裏活着的自己，一個捨棄自己，又得著返自己嘅過程；
第四次，39歲，離開安逸一家開始全職事奉信心生活的距離。
係Comfort zone唔怕生活唔到，因為好多事都好似掌握之中。當決定以後要做傳道的人，走上網絡媒體宣教士的這一步，就是要告訴自己，我嘅信心從此就只有上帝了，真係要活出非勢力、非才/財能的生命之道，唯有依靠耶和華的靈方能成事。
那一年，聖靈對我說，「離開這裡，我會帶您一家行前面的路。」就係咁，我就帶著一家三口（當時兒子立行還好細），由熟悉嘅北區搬到一個朋友都冇嘅荃灣，創立GOD-Platform ，幫立行脫離整個香港傳統教育制度。
來到48歲這一次，離開offline變成online的距離。
上帝帶我走上網絡媒體宣教過去十年，在香港建立所有的根基，由一片荒涼的瘦田，十年間，變成一塊開始結出果子的肥沃土地，在這個時間要離開，何嘗不是離開一個comfort zone。
不過，多得過去四次離開嘅經驗，今次最遠又最「甘」的距離，有著一種不一樣的平安和信靠。加上，自己成日講的O2O網絡宣教思維，無理由自己唔親身體驗下、行動下，好好活一次先知道講嘅係得唔得。傳道信道行道，這個也是一種修道旅程。
離開了comfort zone，再一次看見自己渺小。再一次看見上帝的偉大。
好記得，影呢張相嘅時候，飛機由香港去緊荷蘭轉機途中，瞓醒，望一望飛機出面一個好靚嘅晨光，再睇返飛機顯示當其時嘅位置，正正下面就係俄羅斯的莫斯科。
好記得，望著窗外，當其時有一種莫名嘅感動，感覺自己非常非常渺小，但係又同時活在一個非常之浩大嘅世界之中，然後，聖靈同我講，在我裡面的，比這世界更大。
前面的路，我唔知，暫時只係知道，離開了comfort zone，再一次看見自己渺小，同時，要相信上帝的偉大。
共勉。
